a11

చూచుచున్నాము నీ వైపు మా ప్రియ జనక చూచుచున్నాము నీవైపు చూచుచు నీ ప్రేమ సొంపు సువార్తను జాచుచు గరములు చక్కగా నీవైపు ||చూచు||

మేమరులమై యుంటిమి మార్గము వీడి మేమందరము పోతిమి ప్రేమచే నప్పుడు ప్రియ తనయ నంపించి క్షేమమార్గము మాకు బ్రేమను జూపితివి ||చూచు||

నిను నమ్ము పాపులకు వారెవరైన నీ శరణు జొచ్చువారలకు ఇనుడవు కేడెంబు నీ జగతిలో నగుచు గనుపరచుచుందువు ఘన మైన నీ కృప ||చూచు||

నీ భయము మాయెదలను నిలుపుము నీదు ప్రాభవ మొనరంగను నీ భయముచే మేము వైభవ మొందుచు నే భయము లేకుండ నీ భువిని గొన్నాళ్ళు ||చూచు||

దయజూచి మము నెప్పుడు మంచివి యన్ని దయచేయు మెల్లప్పుడు దయచేయరానివి దయచేయుమని కోర దయజూపి మన్నించు దయగల మా తండ్రి ||చూచు||